Қоғамдағы құқықтық тәртіпті сақтау, жастар мен жасөспірімдер арасындағы құқық бұзушылықтардың алдын алу – мемлекет алдындағы маңызды міндеттердің бірі. Осы бағытта 2025 жылдың тамыз айында Кентау қалалық Полиция бөлімі мен «Жастар ресурстық орталығы» КММ-нің заңгері Шакиров Бекнурдың қатысуымен Байылдыр ауылында түнгі рейдтік іс-шара ұйымдастырылды.

Рейдтің мақсаты – кәмелеттік жасқа толмаған жасөспірімдердің түнгі уақытта (сағат 22:00-ден кейін) заңды өкілінсіз көшеде жүруінің алдын алу, құқықбұзушылық пен нашақорлықтың, сондай-ақ жастар арасындағы қылмыстың алдын алу. Сонымен қатар, құқық бұзуға бейім жасөспірімдерді анықтап, оларға қажетті құқықтық кеңес беру.

Рейд барысында мамандар ауыл ішінде жастар жиі жиналатын орындарды – саябақтар, ойын-сауық нүктелері, дүкен маңдары, тұрғын үй аулалары мен басқа да қоғамдық орындарды аралап, түсіндірме жұмыстарын жүргізді. Жасөспірімдерге заңнама талаптары түсіндіріліп, олардың түнгі мезгілде заңды өкілінсіз қоғамдық орында жүруі құқықбұзушылық болып саналатыны ескертілді.

КЕНТАУ ҚАЛАСЫ БОЙЫНША СТАТИСТИКА:
2025 жылдың алғашқы 7 айында Кентау қаласы бойынша кәмелетке толмағандар тарапынан жасалған 68 құқықбұзушылық фактісі тіркелген. Оның ішінде:

• 21 дерек – қоғамдық орында тәртіп бұзу;

• 17 жағдай – түнгі уақытта заңды өкілінсіз жүру;

• 9 оқиға – есірткі құралдарын пайдалану немесе сақтау күдігімен тіркелген;

• Қалған бөлігін ұсақ бұзақылық пен мүліктік құқықбұзушылықтар құрайды.

Бұл деректердің ішінде ауылдық елді мекендердегі құқықбұзушылықтар да бар, сондықтан алдын алу шараларының маңыздылығы арта түсуде.

Рейд нәтижесі:
Байылдыр ауылында өткен рейд барысында заң бұзушылық әрекеттер тіркелген жоқ. Ауыл жастары мен ата-аналар тарапынан бұл шараға түсіністікпен қарау байқалды. Ата-аналарға өз балаларының жүріс-тұрысына мұқият болу қажеттігі ескертілді.

Мамандар атап өткендей, мұндай түнгі рейдтер – тек бақылау емес, сонымен қатар алдын алу, түсіндіру, құқықтық сауаттылықты арттыру жұмыстарының маңызды бөлігі. Жастардың өз құқықтары мен міндеттерін түсінуі – олардың болашақта заңға қайшы әрекеттерден аулақ болуына ықпал етеді.

Қорытынды:
Кентау қаласы мен оған қарасты елді мекендерде жастар арасындағы құқықбұзушылықтың алдын алу мақсатындағы рейдтік шаралар жалғасатын болады. Қоғамдық тәртіпті сақтау, жастарды жат әрекеттерден қорғау – тек полиция мен мемлекеттік органдардың ғана емес, барша қауымның ортақ міндеті.

Ата-аналарға үндеу:
Балаңыздың кешкі уақытта қайда, кіммен жүргенін біліп отырыңыз. Құқықтық жауапкершілік тек балаға емес, оның заңды өкіліне де жүктелуі мүмкін екенін ұмытпаңыз.