Түркістан облысында 896 мың гектарға ауыл шаруашылығы дақылдары егіледі Түркістан облысында көктемгі егіс науқанына дайындық қызу жүріп жатыр. Биыл өңірде 896 мың гектар жерге ауыл шаруашылығы дақылдарын егу жоспарланған. Бұл көрсеткіш өткен жылмен салыстырғанда 26 мың гектарға артық. Егістік құрылымы: • Жаздық дақылдар – 518 мың гектар • Күздік дақылдар – 204 мың гектар • Көпжылдық шөптер (жоңышқаны қоса алғанда) – 174 мың гектар Фермерлерге қолдау көрсетілуде Ауыл шаруашылығы тауарын өндірушілерге жеңілдетілген дизель отыны бөлінді. Шаруаларға литрі 254 теңгеден дизель жеткізіледі. Бұл баға нарықтық бағадан 13-15 пайызға арзан. Түркістан облысының әкімі Нұралхан Көшеров: – Өңірлік операторлар арқылы дизель отынының үздіксіз жеткізілуін қамтамасыз ету керек. Сондай-ақ, жергілікті шаруаларға минералды тыңайтқыштар мен сапалы тұқымның дер кезінде жеткізілуіне кепілдік беру маңызды. Суды үнемдейтін технологияларды қолдануға ерекше назар аудару қажет, – деді. Биылғы егіс маусымында су тапшылығына жол бермеу және өнімділікті арттыру үшін барлық қажетті шаралар қолға алынуда.