Қазіргі таңда жаһандық және ұлттық деңгейде жастардың өміріне қауіп төндіретін аса өзекті мәселелердің бірі – есірткі заттарының заңсыз айналымы. Бұл – тек қылмыстық сипаттағы әрекет емес, сонымен бірге ұлт болашағына тікелей қауіп төндіретін фактор. Осы күрделі мәселенің алдын алу және құқықтық түсіндіру жұмыстарын жүргізу мақсатында Кентау қаласы әкімдігінде маңызды жиын – есірткіге қарсы дөңгелек үстел отырысы өткізілді.

Іс-шараны ұйымдастыруға Кентау қалалық ішкі саясат бөлімі мен «Жастар ресурстық орталығы» КММ бастамашы болып, оған Полиция басқармасының (ПБ) өкілдері, қала жастары, қоғамдық ұйымдардың мүшелері, ардагерлер кеңесі мен білім беру саласының қызметкерлері қатысты.

Жиынның негізгі мақсаты:

• Қала аумағында есірткі құралдарының заңсыз айналымына жол бермеу;

• Әсіресе, қарасора (конопля) өсімдігінің заңсыз егілуі мен таралуының алдын алу;

• Қала тұрғындарының, әсіресе жастардың есірткіге қарсы иммунитетін қалыптастыру;

• Құқық қорғау органдары мен қоғам арасындағы өзара байланысты нығайту;

• Заң талаптарын еске салып, әкімшілік және қылмыстық жауапкершілік туралы түсіндіру.

 Есірткімен күрестегі нақты қадамдар:

Кентау қалалық Полиция басқармасының өкілдері дөңгелек үстелде сөйлеген сөздерінде соңғы жылдары есірткіге қатысты құқық бұзушылықтар саны азайып келе жатқанын, бірақ бұл бағытта жұмысты бәсеңдетуге болмайтынын атап өтті.
Қаланың шет аймақтары мен ауылдық округтерінде қарасора өсімдігінің өсіп кету қаупі бар екенін ескере отырып, биылғы маусымда құқық қорғау органдары жергілікті тұрғындармен бірге бірнеше рет рейдтік шаралар ұйымдастырған.

Полиция қызметкерлері тек жазалау шараларын ғана емес, ең алдымен алдын алу және түсіндіру жұмыстарын басты назарға алып отыр. Бұл бағытта жастармен, ата-аналармен және ауыл ақсақалдарымен кездесулер, түсіндірме парақшаларының таралуы, білім беру мекемелерінде дәрістер өткізу – күн тәртібінен түспей келеді.

 Қоғам не дейді?

Жиын барысында сөз алған қоғам белсенділері мен педагогтар есірткі мәселесіне қарсы күресте барша қоғамның жұмыла әрекет етуі қажет екенін атап өтті.

«Бұл – тек полицияның немесе әкімдіктің емес, бүкіл халықтың ортақ ісі. Әрбір ата-ана өз баласына жауапты. Әр тұрғын – қоғамның қауіпсіздігіне жауапты», – деді жиын қатысушыларының бірі, зейнеткер ұстаз А. Омарова.

Сондай-ақ, жастар өкілдері психоактивті заттарға қарсы ақпараттық жұмыстарды көбейту, әлеуметтік желілерде арнайы контент жариялау, спорттық және мәдени іс-шараларды арттыру туралы ұсыныстарын жеткізді.

 Заң не дейді?

Полиция басқармасының мәліметінше, ҚР Қылмыстық кодексінің 296-298 баптарына сәйкес, есірткі заттарын заңсыз сақтау, пайдалану, тарату және өсіру – қылмыстық жауапкершілікке алып келеді. Әсіресе, кәмелетке толмағандар арасында есірткі заттарын таратуға немесе пайдалануға итермелеу – ауыр қылмыс болып саналады.

Сонымен қатар, қарасора өсімдігін заңсыз егу де ҚР заңнамасы бойынша қатаң жазаланады, ал ондай әрекет анықталған жағдайда жеке меншік жер учаскесі тәркіленуі мүмкін.

 Статистика не дейді?

Кентау қалалық ПБ мәліметтеріне сәйкес, 2024 жылдың 12 айында есірткі заттарының заңсыз айналымына қатысты 7 іс тіркелген, оның ішінде 2 оқиға – қарасора өсімдігінің заңсыз егілгені үшін, ал қалғандары – сақтау және тасымалдау әрекеттерімен байланысты болған. 2023 жылмен салыстырғанда құқық бұзушылық саны 2 есеге төмендеген. Бұл көрсеткіш алдын алу шараларының тиімділігін көрсетеді.

«Есірткі – болашағымызға балта шабу» деген ұғым – жай сөз емес, нақты шындық. Сондықтан қоғам болып бірігіп, заңды сақтау мен жастардың санасын қорғау – баршамыздың борышымыз. Кентау қаласы әкімдігі, жастар ресурстық орталығы және құқық қорғау органдары бұл бағыттағы жұмыстарды тұрақты түрде әрі жүйелі жалғастыратынын мәлімдеді.