Шығыс Қазақстан облысының Ұлан ауданында орналасқан «ВК-Бекон» ЖШС шамамен 8 мың бас шошқа өсіреді. Мұнша мал басы болған жағдайда олардың қалдықтарын дұрыс утилизациялау – ферма жұмысының міндетті бөлігі. Алайда кәсіпорын бұл талапты сақтамаған.

Экология департаментіне жергілікті тұрғындардан шағым түскеннен кейін мекемеге тексеріс жүргізілді.

Не анықталды?

Тексеру барысында бірқатар экологиялық заңбұзушылықтар белгілі болды:
— жобада қарастырылған қалдықтарды сусыздандыруға арналған нысандардың болмауы;
— рұқсатсыз ағынды су төгу;
— қалдықтарды арнайы жабдықталмаған аумақтарда сақтау.

Экология департаментінің мәліметінше, анықталған заңбұзушылықтар үшін кәсіпорын ҚР ӘҚБтК-нің 332, 344, 325, 327-1 және 328-баптары бойынша әкімшілік жауапкершілікке тартылған.

– Тексеру материалдары Өскемен қаласының әкімшілік сотына жолданды, – деп хабарлады ШҚО Экология департаменті.

Қанша айыппұл салынды?

Экологиялық нормаларды бұзғаны үшін шошқа фермасы шамамен 2 миллион теңге көлемінде айыппұл төлейді.