Түркістан облысында түйе көтеретін палуан тұрады ТҮРКІСТАН ОБЛЫСЫ. Сайрам ауданына қарасты Оймауыт ауылында ерекше күш иесі өмір сүреді. Жерлестері «Бөрте» деп атайтын Біржан Сағадатұлы ешқандай арнайы дайындықсыз-ақ түйе көтеріп, көлік сүйрейтін қасиетімен көпшілікті таңғалдырып жүр. Біржан — алып күштің иесі. Оның айтуынша, спорт залға барып, арнайы жаттығулар жасамаған. Күш-қуаты табиғи түрде дарыған. – Арнайы дайындықтан өтпедім. Шынығу залдарына бармаймын. Ауыр заттарды қиналмай-ақ көтере беремін. Бұл — Алланың берген күші, – дейді ол. Оның бұл ерекшелігі кездейсоқ емес. Біржан өзіне бұл қасиет атасы Жақыпбектен дарығанын айтады. Жергілікті тұрғындар кезінде Жақыпбектің көліктің моторын жалғыз өзі көтергенін еске алады. Біржан балалық шағында қозы мен лақты көтеріп өскен. Кейін қой, қошқар, тіпті, түйені де иығына салып жүре беретін күшке ие болды. Қазір оның әлеуметтік желідегі видеолары көпшіліктің қызығушылығын тудырып отыр. Желіде Біржанның түйе көтеріп, есектің үстіндегі баланы оңай көтеріп алғаны, жеңіл көлікті қозғалтқаны, тіпті, үлкен тастарды қысып алып жүгіргені бейнеленген. Бұл видеолар оқырмандар тарапынан жақсы пікірлер мен жылы лебіздерге ие болды. Жерлестері оны атақты Қажымұқан Мұңайтпасұлының жолын жалғаушы деп біледі. Ауылдастарының айтуынша, Біржан тек күш иесі ғана емес, салмақты мінезді, тәрбиелі азамат ретінде де құрметке ие.