Түркістан облысында «Түнгі қаладағы балалар» жедел-профилактикалық іс-шарасы өткізілуде. Бұл шараның негізгі мақсаты – жасөспірімдер арасындағы қылмыстың, құқық бұзушылықтың алдын алу және кәмелетке толмағандардың түнгі уақытта заңды өкілдерінсіз үйден тыс жерде болуына жол бермеу.

Қоғамда тәртіп пен қауіпсіздікті қамтамасыз ету, болашақ ұрпақтың тәрбиесіне жан-жақты мән беру – қазіргі таңдағы өзекті мәселелердің бірі. Осы орайда Түркістан облысы полиция департаментінің бастамасымен өңір аумағында ұйымдастырылып жатқан «Түнгі қаладағы балалар» іс-шарасы аясында құқық қорғау органдарының қызметкерлері бірқатар маңызды профилактикалық жұмыстарды жүргізуде.

Іс-шараның алғашқы күнінде-ақ полицейлер 140-тан астам әкімшілік құқық бұзушылықты анықтады. Бұл деректердің өзі өңірде кәмелетке толмағандармен жұмыс жүргізудің маңыздылығын және мұндай рейдтердің өзектілігін дәлелдейді. Атап айтқанда, ата-аналардың өз балаларына тиісті түрде бақылау жүргізбеуі және тәрбиелеу жөніндегі міндеттерін орындамауының 13 фактісі тіркелді. Бұл ата-аналарға қатысты ҚР Әкімшілік құқық бұзушылық туралы кодексінің тиісті баптарына сәйкес әкімшілік шаралар қолданылды.

Сонымен қатар түнгі уақытта заңды өкілдерінің еріп жүруінсіз үйден тыс жерде жүрген 120 кәмелетке толмаған жасөспірім анықталып, олармен профилактикалық сипаттағы түсіндіру жұмыстары жүргізілді. Жасөспірімдердің қауіпсіздігін қамтамасыз ету мақсатында олар ата-аналарына табысталып, кейбір жағдайларда қорғаншылық органдарына хабар берілді.

Шара барысында құқық бұзуға бейім 13 жасөспірім профилактикалық есепке қойылды. Бұдан бөлек, өмір сүру жағдайы төмен және әлеуметтік жағдайы қиын 6 отбасы да учаскелік инспекторлардың бақылауына алынды. Бұл отбасылармен алдағы уақытта әлеуметтік қызметкерлер мен педагогтар бірлесіп жұмыс жүргізетін болады.

Профилактикалық рейд барысында полицейлер тұрғындар арасында, әсіресе ата-аналармен және мектеп жасындағы балалармен түсіндіру әңгімелерін өткізді. Бұл кездесулерде балалардың түнгі уақытта көшеде жүруі, ойын-сауық мекемелеріне заңды өкілдерінсіз баруы – олардың қауіпсіздігіне қатер төндіретіні туралы айтылды. Сонымен бірге, баланың тәрбиесінде отбасының рөлі, ата-ананың жауапкершілігі және заң алдындағы міндеттері де түсіндірілді.

Одан бөлек, іс-шара шеңберінде тәртіп сақшылары көшелер мен қоғамдық орындарда жаяу патрульдеуді күшейтті. Бұл өз кезегінде тек кәмелетке толмағандардың ғана емес, бүкіл қоғамның қауіпсіздігін қамтамасыз етуге бағытталған қадам. Жол қозғалысы ережелерін сақтау мәселесі де назардан тыс қалмады. Полицейлер көлік жүргізушілеріне жолда мұқият болудың, жылдамдық режимін сақтаудың және жаяу жүргіншілерге жол беру қажеттілігінің маңызын ескертті. Әсіресе мектеп жанындағы аймақтарда арнайы рейдтер ұйымдастырылып, «қауіпсіз жол» қағидасына баса назар аударылды.

Тәртіп сақшылары қазіргі кезде кәмелетке толмағандардың арасында орын алатын құқық бұзушылықтар мен қылмыстардың алдын алу – қоғамның, отбасының және білім беру ұйымдарының бірлескен жауапкершілігі екенін ерекше атап өтуде. Балалар мен жасөспірімдердің бос уақытын тиімді ұйымдастыру, олардың тәрбиесіне ерекше көңіл бөлу – құқық бұзушылықтың алдын алудың ең тиімді жолы. Осыған байланысты полиция департаменті ата-аналарды өз балаларының тәртібін бақылауда ұстауға, олардың кіммен араласатынына, немен айналысатынына жіті көңіл бөлуге шақырады.

Полицейлердің айтуынша, көптеген құқық бұзушылықтар мен қайғылы жағдайлар дәл осы түнгі уақытта балалардың қараусыз жүруінен туындайды. Мұндай жағдайлардың алдын алу – тек тәртіп сақшыларының емес, әрбір ата-ананың, ұстаздың және тұтас қоғамның ортақ міндеті. Сол себепті де Түркістан облысында ұйымдастырылып жатқан «Түнгі қаладағы балалар» іс-шарасы үлкен қоғамдық маңызға ие.

Түркістан облысы полиция департаментінің мәліметінше, бұл бағыттағы жұмыстар алдағы уақытта да жалғасын табады. Профилактикалық рейдтер тұрақты түрде жүргізіліп, құқық бұзушылықтың алдын алу шаралары кешенді түрде жүзеге асырылатын болады. Болашақ ұрпақтың амандығы мен қауіпсіздігі – әрбіріміздің басты құндылығымыз екенін ұмытпайық.