2026 жылдың алғашқы алты айында Сауран ауданында тіркелген қылмыстық құқық бұзушылықтардың басым бөлігін алаяқтық қылмыстары құрады. Сараптама көрсеткендей, алаяқтықтың негізгі үлесін интернет арқылы жасалатын қылмыстар мен азаматтардың сеніміне кіру арқылы жүзеге асырылатын заңсыз әрекеттер құрап отыр. Бұл құқық қорғау органдарының ғана емес, бүкіл қоғамның назарын талап ететін өзекті мәселелердің біріне айналды.

Есепті кезеңде ауыр санаттағы алаяқтық қылмыстарының саны өткен жылдың сәйкес кезеңімен салыстырғанда 36-дан 37 дерекке дейін өсті. Сонымен қатар интернет-алаяқтық фактілері 4-тен 11 дерекке дейін артып, бұл бағыттағы қауіптің күшейгенін көрсетті.

Қылмыс көрсеткішінің артуына әсер еткен негізгі себептердің бірі – мемлекеттік қайтарымсыз грант алып беремін деген желеумен азаматтарды алдау фактілерінің анықталуы болды. Тергеу барысында күдікті азаматқа қатысты бірнеше эпизод бойынша сотқа дейінгі тергеп-тексеру басталып, жәбірленушілердің арыздары заң талаптарына сәйкес тіркелді. Әрбір қылмыстық әрекетке құқықтық баға беріліп, кінәлі тұлғаны жауапкершілікке тарту бағытында тергеу амалдары жүргізілуде.

Соңғы уақытта интернет кеңістігінде жасалатын алаяқтықтың түрлері де көбейді. Қаскөйлер әлеуметтік желілер, мессенджерлер және жалған интернет-сайттар арқылы азаматтардың жеке мәліметтерін иемденіп, банк карталарының деректерін алуға немесе түрлі инвестициялық жобаларға ақша салуға үгіттеу арқылы заңсыз пайда табуды көздейді. Кей жағдайда өздерін банк қызметкері, құқық қорғау органы немесе мемлекеттік мекеме өкілі ретінде таныстырып, тұрғындарды алдап соғу әрекеттері кездеседі.

Осындай құқық бұзушылықтардың алдын алу мақсатында Сауран аудандық полиция бөлімі тұрғындар арасында тұрақты түрде ақпараттық-түсіндіру жұмыстарын жүргізіп келеді. Елді мекендерде кездесулер ұйымдастырылып, әлеуметтік желілерде ескерту сипатындағы материалдар жариялануда. Сонымен қатар тұрғындарға күмәнді қоңырауларға сенбеу, жеке және банк деректерін бөгде адамдарға бермеу, белгісіз сілтемелерге өтпеу және күмәнді қаржылық ұсыныстардан бас тарту жөнінде кеңестер берілуде.

Құқық қорғау органдары алаяқтықтың әрбір фактісі бойынша жедел әрекет етіп, кінәлі тұлғаларды анықтау және оларды заң аясында жауапкершілікке тарту жұмыстарын жүйелі түрде жүргізуде. Сонымен қатар заманауи технологияларды пайдалану арқылы интернет кеңістігіндегі заңсыз әрекеттерді анықтау мүмкіндіктері де кеңейтілуде.

Алаяқтық қылмыстарының алдын алуда әр азаматтың құқықтық сауаттылығы мен сақтығы ерекше маңызға ие. Сондықтан тұрғындар күмәнді ұсыныстарға сенбей, кез келген қаржылық операция алдында ақпараттың шынайылығын мұқият тексеруі қажет. Азаматтардың қырағылығы мен полицияның жүйелі профилактикалық жұмысы ғана мұндай қылмыстардың санын азайтуға мүмкіндік береді.