Түркістан облысы Мақтаарал ауданы – еліміздің оңтүстігіндегі ауыл шаруашылығы қарқынды дамып келе жатқан аймақтардың бірі. Аудан экономикасының негізгі тірегі – агроөнеркәсіп кешені. Бұл сала халықты жұмыспен қамтуда, азық-түлік қауіпсіздігін қамтамасыз етуде және өңірдің әлеуметтік-экономикалық дамуына серпін беруде маңызды рөл атқарады.

Соңғы жылдары агроөнеркәсіп кешенін дамыту бағытында мемлекеттік қолдаулар күшейіп, нақты жобалар жүзеге асырылуда. Егін шаруашылығында заманауи технологиялар енгізіліп, жоғары өнімді тұқымдар пайдаланылуда. Әсіресе, мақта өсіру – ауданның басты брендіне айналған. Сонымен қатар, көкөніс, бақша дақылдары мен дәнді дақылдарды өсіру көлемі де жыл сайын артып келеді.

Ауыл шаруашылығы өнімдерін өңдеу саласы да назардан тыс қалған жоқ. Қазіргі таңда ауданда өнімді қайта өңдейтін шағын және орта кәсіпорындар саны көбейіп, қосымша құн қалыптастыруға мүмкіндік беруде. Бұл өз кезегінде шикізатты тек өндірумен шектелмей, дайын өнім шығаруға жол ашады.

Агроөнеркәсіп кешенін дамытуда цифрландыру, агротехникалық талаптарды сақтау, субсидиялау жүйесі және инвестиция тарту мәселелері де басты назарда. Мұндай кешенді жұмыстар Мақтаарал ауданын ауыл шаруашылығы бойынша жетекші өңірлердің біріне айналдыруға негіз қалайды.