Қоғамдағы тұрақтылық пен азаматтардың қауіпсіздігін қамтамасыз етудің басты шарттарының бірі – заң талаптарын сақтау және қоғамдық тәртіпті нығайту. Мемлекет саясатының маңызды бағыттарының бірі саналатын «Заң және тәртіп» қағидаты әрбір азаматтың құқықтық жауапкершілігін арттыруға, заң бұзушылықтарға немқұрайлы қарамауға және әділетті қоғам қалыптастыруға бағытталған.

Сауран ауданында аталған бағыт бойынша тұрғындардың құқықтық сауатын арттыру, заң талаптарын түсіндіру және құқық бұзушылықтардың алдын алу мақсатында кешенді жұмыстар жүргізілуде. Ақпараттық ресурстар арқылы азаматтарға заң нормаларын сақтау, қоғамдық тәртіпті бұзудың салдары және құқықтық жауапкершілік туралы тұрақты түрде түсіндіру жұмыстары ұйымдастырылып келеді.

«Нөлдік төзімділік» қағидатының негізгі мақсаты – кез келген құқыққа қайшы әрекетке бейжай қарамау. Себебі ұсақ құқық бұзушылықтарға уақытында назар аудару арқылы ауыр қылмыстардың алдын алуға болады. Осы бағытта полиция қызметкерлері тұрғындармен кездесулер өткізіп, қоғамдық орындардағы тәртіп, абаттандыру талаптарын сақтау, жол қозғалысы ережелерін орындау және заң талаптарына бағыну жөнінде түсіндіру жұмыстарын жүргізуде.

Атқарылған профилактикалық шаралардың нәтижесінде аудан аумағында түрлі бағыттағы құқық бұзушылықтардың алдын алу жұмыстары күшейтілді. Мәселен, учаскелік полиция инспекторларының қатысуымен әкімшілік құқық бұзушылықтарды анықтау және болдырмау бойынша жұмыстар жүргізіліп, жалпы 2992 әкімшілік құқық бұзушылық бойынша тиісті шаралар қабылданды. Оның ішінде қоғамдық тәртіпті бұзу, абаттандыру талаптарын сақтамау және басқа да құқыққа қайшы әрекеттер бойынша заң талаптарына сәйкес шешімдер қабылданды.

Заң үстемдігін қамтамасыз етуде азаматтардың құқықтық мәдениеті ерекше рөл атқарады. Заңды білу және оны құрметтеу – тек мемлекеттік органдардың міндеті емес, әрбір тұрғынның азаматтық жауапкершілігі. Осы мақсатта интернет ресурстары арқылы құқықтық ақпараттарды тарату, түсіндіру материалдарын жариялау және қоғамның құқықтық сауатын арттыру бағытындағы жұмыстар маңызды орын алады.

«Заң және тәртіп» ұстанымы құқық қорғау органдары мен халық арасындағы өзара сенімді нығайтуға да ықпал етеді. Полиция қызметінің ашықтығы, тұрғындармен тұрақты байланыс орнату және азаматтардың өтініштеріне уақытылы жауап беру – қауіпсіз қоғам қалыптастырудың негізгі тетіктерінің бірі.

Қоғамдық тәртіпті сақтау тек бақылау немесе жауапкершілік шараларымен шектелмейді. Оның негізінде азаматтардың заңға деген құрметі, өз міндеттерін түсінуі және ортақ қауіпсіздікке үлес қосуы жатыр.

Сауран ауданында заңдылықты нығайту, құқық бұзушылықтардың алдын алу және тұрғындардың құқықтық санасын арттыру бағытындағы жұмыстар алдағы уақытта да жалғаса береді. Әділетті әрі қауіпсіз қоғам қалыптастыру – мемлекеттік органдар мен азаматтардың бірлескен еңбегінің нәтижесі.